Се уште трае потрагата по исчезнатото повозрасно лице од штипското село Степанци, кое е пријавено за исчезнато на 7 април во 16:20 часот преку Единствениот повикувачки број за итни случаи 112.

Во текот на вчерашниот ден потрагата по исчезнатото лице се одвиваше во реонот на село Степанци.

Во последните неколку денови на потрагата се приклучија и доброволци и членови од повеќе здруженија.

Планирано е да бидат вклучени по десет полицајци и извидници – членови на Извиднички одред „Еквинокс – Штип“, ловци – членови на ЛЗ „Ловец“ од Штип, доброволци – вработени од РЦУК Штип, лица од локално население од блиските села околу Степанци, а и роднини на исчезнатото лице, наведува ЦУК.

Известени се МВР Штип и Општина Штип, како и други институции и служби, здруженија и граѓани коишто можат да помогнат.

Имало шест пожари на отворено во последното деноноќие (Скопско, Битолско, Гевгелиско, Штипско, Кочанско и во Кумановско), а пожарникарите гаснеле, паралелно, и други пожари во населени места и сите биле изгаснати, информира ЦУК.

Центарот за управување со кризи соопшти дека во последното деноноќие имало вкупно 2044 повици на Единствениот повикувачки број за итни случаи 112 од коишто „реални“ повици биле 56,65 отсто, а 43,85 отсто биле за други потреби на граѓаните што не биле итни.

ЦУК го пренесува и известувањето на РЦУК Битола дека поради настанато свлечиште на патот што ги поврзува крушевското село Долно Дивјаци и демирхисарското село Кочишта, состојбата на патот оневозможува безбеден сообраќај.