Во денешно време се соочуваме со многу закани, вклучувајќи нови конфликти, тероризам, насилен екстремизам, ризици од нови технологии, кршење на човековите права и климатски промени, а ниту една земја сама не може да се справи со овие предизвици, па е неопходен ефикасен мултилатерализам за обезбедување на меѓународниот мир и безбедност, рече министерот за надворешни работи и надворешна трговија, Тимчо Муцунски во своето обраќање на Самитот на иднината во Њујорк, на интерактивниот дијалог на тема: „Зајакнување на мултилатерализмот за меѓународниот мир и безбедност“ кој се одржа на маргините на 79-то Генерално собрание на Обединетите Нации.

Пактот ни нуди траекторија за глобални акции и отвора пат за засилување на мултилатерализмот, истакна Муцунски во обраќањето.

Самитот на иднината претставува можност за зајакнување на глобалното владеење и одговор на актуелните и идните предизвици.

Во своето обраќање, министeрот Муцунски нагласи дека во денешно време се соочуваме со многу закани, вклучувајќи нови конфликти, тероризам, насилен екстремизам, ризици од нови технологии, кршење на човековите права и климатски промени.

Утре веќе е наша сегашност – додаде Муцунски, истакнувајќи ја подготвеноста активно да учествуваме во напорите за зајакнување на мултилатерализмот.

Денес имаме уникатна шанса да ја зајакнеме нашата мултилатерална агенда и глобалните системи, прилагодувајќи ги на предизвиците со кои се соочуваме во областа на меѓународниот мир и безбедност.

Министерот за надворешни работи и надворешна трговија Тимчо Муцунски денешната прва билатерална средба со неговиот грчки колега Јоргос Герапетритис ја оцени како одлична, позитивна и конструктивна.

Сметам дека во духот на добрата верба и во духот на почитувањето на обврските кои произлегуваат од меѓународното јавно право заеднички ќе работиме сите да ги реализираме обврските кои што ги имаме – изјави Муцунски по средбата, јави известувачот на МИА од Њујорк.

На средбата која се одржа во просториите на Мисијата на Грција во Обединетите Нации во Њујорк, било отворено прашањето и за примена на Преспанскиот договор.

Очекуваме денешната средба да биде отворање на еден нов лист на односите помеѓу двете влади на добра комуникација, и повторно ќе кажам да разговараме за многу проекти кои заеднички можеме да ги реализираме, а кои што ќе донесат економска благосостојба и за двете држави и народите на двете држави и подобро поврзување и од инфраструктурна и од енергетска гледна точка, рече Муцунски.

Се договоривме понатаму да имаме активна комуникација по однос и на предизвиците кои секако ќе се појавуваат помеѓу двете држави.

Сметам дека е значајно што имавме оваа средба.