Надлежен орган за контролира на примената на Законот е Комисијата за заштита на конкуренцијата, која ја контролира примената на одредбите од овој закон и поведува прекршочна постапка доколку се прекрши било која мандаторна одредба од Законот.

Доколку рокот на склучен договор за снабдување на земјоделски и прехранбени производи завршува додека трае преодниот период, добавувачот и купувачот се должни новиот договор да го склучат согласно одредбите на овој Закон од причина што основот за трговски практики во деловното работење меѓу добавувач и купувач се одредбите во овој закон – велат од Министерството за економија и труд.

Онаму каде што ќе се утврди дека се прекршени одредбите на Законот, се одредува казна односно висина на глоба, дефинирајќи го нејзиното ниво и рокови за плаќање.

Решенијата за сторен прекршок се објавуваат на веб страницата на Комисијата за заштита на конкуренцијата.

При изрекувањето на казните односно глоби, Комисијата за заштита на конкуренцијата ги зема предвид сите олеснителни и отежнувачки околности, како што се тежината, обемот и времетраењето на прекршокот и последиците што овој прекршок ги има врз добавувачите – прецизираат од Министерството за економија и труд.

Против решенијата може да се поднесе тужба за поведување на управен спор пред надлежен суд.

Тужбата за поведување на управен спор се поднесува во рок од 30 дена од денот на приемот на решението и не го одлага извршувањето на решението- велат од Министерството за економија и труд.

Како што нагласуваат, решенијата на Комисијата за заштита на конкуренцијата се конечни.

Со Законот, покрај ограничен рабат, трговците нема да смеат да наплаќаат дополнителни трошоци за маркетинг, репрезентација, како и за истакнување одреден производ на полица.

Од вторникот, пак, на сила е одлуката на Владата за ограничувања на профитната маржа до 10% на 73 производи кои се најдоа на листата на „есенската кошница“, што, пак, го контролира Државниот пазарен инспекторат (ДПИ). Токму од ДПИ вчера информираа дека на првиот ден од контролата, кога се контролираа големите маркети, поради утврдени неправилности изречени се парични глоби во висина од околу 20.000 евра.

Денеска завршува преодниот период рок на Законот од 6 месеци за да ги усогласат договорите со одредбите на овој закон добавувачите и купувачите кои склучиле договори за снабдување на земјоделски и прехранбени производи до денот на влегување во сила на овој закон.