Сообраќајот на државните патишта се одвива во зимски услови.

Забрана за товарни возила на Стража, Ѓавато и Маврово, задолжителна зимска опрема на патот Тетово-Попова Шапка.

Грчкиот премиер, Кирјакос Мицотакис, во интервју за телевизијата „Антена“ изрази уверување дека земјата ќе сфати дека не е во нејзин интерес да продолжи со ставови што создаваат тензија со нејзиниот најголем сосед и инвеститор, Северна Македонија.

Верувам дека земјата ќе сфати дека не е во нејзин интерес да инсистира на ставот што создава проблеми со нејзиниот најголем сосед, кој исто така е и голем инвеститор во земјата и од кого очекува поддршка на европски пат, рече грчкиот премиер Кирјакос Мицотакис во интервјуто за телевизијата „Антена“, говорејќи за односите со Северна Македонија и уште еднаш ја повтори позицијата дека очекува јасен став од државниот и политичкиот врв дека го почитува Договорот од Преспа, јави дописничката на МИА од Атина.

Времето денеска ќе биде облачно со повремени врнежи од дожд и снег, наместа во западните и јужните делови пообилни (над 30 l/m2). На планините и на повисоките места, претежно во западните делови врнежите ќе бидат од снег и дополнително ќе се зголеми снежната покривка, соопшти УХМР.

Утрово има појава на магла или ниска облачност по котлините.

По барањето на ДУИ за итна оставка и интерпелација на министерот за внатрешни работи поради полициската интервенција за време на прославите на Денот на албанското знаме, обвинувајќи го министерството за селективен и пристрасен пристап кон граѓаните, министерот Тошковски изјави дека нивното барање е легитимно, но ги обвини за манипулации и лаги.

Апелираме граѓаните да не потпаѓаат на црните сценарија за етнички конфликти чија цел е заштита на личните и бизнис интереси, институциите ќe реагираат жестоко.

Од владејачката ВМРО-ДПМНЕ ја обвинија ДУИ за лицемерие.

Настаните по повод „прославата“ на денот на албанското знаме, инцидентите и дивеењето на неколку групи се смислено сценарио на СДС и ДУИ кои преку манипулација, ескалација и креирање на етнички тензии се обидуваат да го заштитат криминално стекнатиот капитал, велат од ВМРО-ДПМНЕ.

Полициски службеници од СВР Куманово лишија од слобода 17-годишен малолетник од Куманово, постапувајќи по добиена пријава на 29.11.2024 во 9:05 часот дека е откорната табла од канцеларијата на Конзулатот на Република Србија во Македонија, лоциран во Куманово, соопшти МВР.

Амбасадата на Република Србија во Република Северна Македонија денеска преку соопштение најостро го осудува вандалскиот чин што се случи вчера кога од фасадата на зградата на Конзулатот на Република Србија во Куманово, во доцните вечерни часови, младо машко лице, обвиено со албанско знаме, насилно ја отстранило таблата со грбот на Република Србија и натписот „Конзулат на Република Србија во Куманово – Почесен конзул“, напишан на српски и македонски јазик.