Одамна не сме имале снежна атмосфера во Вевчани за Вечванскиот карневал.

Градоначалникот Спасе Кочовски пред почетокот на карневалот рече дека Вевчани е спремно и покрај временските услови гостите да доаѓаат, а Општината направи максимални напори за чистење на пристапните патишта и улици.

Општина Вевчани во соработка со јавното комунално претпријатие „Еремија“ 24 часа е на терен.

Според традицијата, Вевчанскиот карневал, стар околу 15 века, почнува на 13 јануари напладне со дефиле на маски на двете василичарски друштва Горна и Долна маала.

Традиционално, манифестацијата почнува вечерва со забавна програма, а вевчанци и гостите ќе ги забавуваат „Пајак“, „Ареа“ и „Забрањено пушење“.

Манифестацијата завршува со традиционалното василичарско оро и палење на маските во центарот на Вевчани, на 14 јануари.

Бината е подготвена, просторот околу се расчистува од снежните наноси и присутните ќе имаат можност за добра забава и уживање во Вевчани, изјави Кочовски за МИА.

Ги чистиме и регионалните патишта што не поврзуваат со Струга и Дебар за гостите да можат полесно да пристигнат.

Вевчанци на сатиричен начин, во речиси 15-вековна традиција, ги прикажаа случувањата во јавниот и политичкиот живот, како во земјава, така и во странство, од изминатата година.

Василичарскиот дел почнува утре напладне со дефиле под маски низ вевчанските улици, а вечерта присутните ќе ги забавуваат „Љубојна“, Наум Петрески, оркестарот „Вевчани“, како и Перо Бели и Коки Биоритам, кои точно на полноќ на присутните ќе им ја честитаат Новата година, според Јулијанскиот календар.