Американскиот претседател Џо Бајден денеска изјави дека е загрижен за тензиите на Блискиот Исток и увери дека „ќе направи се што може“ за да избегне проширување на конфликтот.
Премиерот на Израел Бенјамин Нетанјаху изјави денеска дека Израел „постапил против Хезболах на начин што не можеле ни да замислат“.
Хезболах утрово од либанска територија истрела 85 ракети врз северен Израел, при што беа повредени три лица, додека израелските сили вршат нов бран воздушни напади врз цели на Хезболах во Либан и се закануваат со интензивирање на нападите, соопшти израелската армија (ИД). Некои од 85-те ракети на Хезболах беа пресретнати, додека некои го погодија Кирјат Биалик во близина на Хаифа и Морешет, заедници во Долна Галилеја, пишува „Тајмс оф Израел“.
Либанската шиитска група Хезболах утринава соопшти дека Ахмед Вахби, висок командант кој ги предводеше воените операции на нивните специјални сили Ар Радван во војната во Газа до почетокот на оваа година, бил убиен во израелски воздушен напад во предградие на Бејрут.