Вчерашниот ирански ракетен напад врз Израел наиде на општа осуда во меѓународната заедница, а нападот, како херојски, беше поздравен само од палестинскиот исламистички Хамас и од милицијата Хути во Јемен.

Американската потпретседателка и демократски кандидат за претстојните претседателски избори, Камала Харис, изјави дека Иран е „опасна“ и „дестабилизирачка“ сила на Блискиот Исток и дека Вашингтон е посветен на безбедноста на Израел.

Европската Унија соопшти дека мора да се избегне каква било нова воена интервенција во Либан, дека треба да се почитува меѓународното хуманитарно право и да се овозможи враќање на раселените лица.

Масовните израелски напади врз Бејрут и низ цел Либан, што почнаа минатиот петок, иако се насочени кон цели на Хезболах, сепак претставуваат кршење на суверенитетот на една независна држава, изјави синоќа високиот претставник на ЕУ за надворешна политика и безбедност Жосеп Борел по завршувањето на неформалниот онлајн состанок на шефовите на дипломатиите на земјите членки на Унијата.

Израелскиот премиер Бенјамин Нетанјаху синоќа изјави дека нападот на Иран врз неговата земја не успеал и вети дека ќе возврати.

Иранскиот напад врз Израел се покажа „неефикасен“ и беше одбиен од израелските сили за противвоздушна одбрана со поддршка на САД, изјави синоќа советникот за национална безбедност на Белата куќа, Џејк Саливан.

Израелската војска соопшти дека Иран истрелал проектили врз Израел, додека сирените за воздушен напад се слушале низ целата земја, а на жителите им било наредено да се засолнат, јавуваат неколку меѓународни новински агенции.

САД веруваат дека Иран наскоро е подготвен да изврши балистички ракетен напад на Израел, предупредил во вторникот висок функционер на Белата куќа, . Во соопштението на Белата куќа се наведува дека постојат индикации дека Иран се подготвува веднаш да изврши напад со балистички ракети против Израел, додавајќи дека Соединетите Држави „активно ги поддржуваат подготовките за одбрана на Израел од овој напад“.

Меѓу целите на вечерашниот ирански ракетен напад врз Израел беа аеродроми и писти, како и канцелариите на израелската меѓународна разузнавачка служба Мосад, јави Си-Ен-Ен. - Цел (на иранскиот напад) беше и штабот на Мосад, кој се наоѓа во северниот дел на Тел Авив, во густо населена област и постои загриженост, и покрај тоа што Иран го смета за воена цел, тоа е густо населена област каде што живеат многу цивили, рече новинарот на Си-Ен-Ен од Тел Авив, Џим Шиуто.

Данската полиција соопшти дека истражува две експлозии во близина на амбасадата на Израел во Копенхаген, пишува данскиот весник „Политикен“.