Поранешниот македонски и европски шампион Вардар тргна со победа во Европската лига на ЕХФ, откако вечерва во СЦ „Јане Сандански“ славеше со 33-26 против Валур.
Освојувачот на ЕХФ Купот за минатата сезона имаше солиден старт и водство од 2-0, но потоа Вардар ги презема работите во свои раце и почна да го полни голот на гостите од Исланд, па така предноста на „црвено-црните“ до крајот на првите 30 минути достигна плус осум (19-11). Вардар го одржуваше водството и во вториот дел, додека Валур во последните 10 минути намали на пет голови негатива (21-26), меѓуто „црвено-црните“ не му дозволија на гостинот дополнително да ја намали разликата и триумфираа со 33-26. Најдобри во редовите на скопскиот гигант беа Вуко Борозан и Марко Срдановиќ со по шест погодоци, додека голманот Мигуел Еспиња Фереира запиша 15 одбрани.