Шефицата на државата Гордана Сиљановска-Давкова смета дека е можен напредок во односите со Бугарија.

Интензивирање на дипломатските канали во текот на следниот месец, кога ќе се одржи и Самитот на ЕУ, во насока на презентирање на ставот на земјава за продолжување на процесот на евроинтеграција, најавуваат извори од кабинетот претседателката на државата на денешниот брифинг со новинарите.

Новиот француски амбасадор во земјава Кристоф Ле Риголер во интервју за МИА изјави дека соработката меѓу Париз и Скопје постоеше и пред пристапувањето на Северна Македонија во НАТО, а членството во Алијансата обезбедува дополнителна рамка за соработка и солидарност во областа на одбраната.

Високиот претставник на ЕУ за надворешна политика и безбедност Жозеп Борел на денешната прес-конференција во Бејрут апелираше да се изврши притисок врз израелската Влада и либанското движење Хезболах да го прифатат американскиот предлог.

Претседателот на САД и на Франција, Џо Бајден и Емануел Макрон синоќа телефонски разговараа за можноста за прекин на огнот помеѓу Израел и Хезболах во Либан, соопшти Белата куќа.

Либанското Министерство за здравство соопшти дека во денешниот израелски воздушен напад врз Бејрут загинале најмалку 11 луѓе, а 63 се повредени.

Дритон Суљејмани од „Влен“ на денешната прес-конференција нагласи дека за враќање на поранешниот премиер Никола Груевски од Будимпешта во март во Вила Водно се сретнале претставници на ДУИ, СДСМ и поранешниот претседател на државата Стево Пендаровски.

Јавноста деновиве дозна шокантни детали за тоа како ДУИ, како во холивудско филмско сценарио, го оркестрирала сензационалното враќање на поранешниот премиер Никола Груевски во Скопје, велат од коалицијата ВЛЕН (ВРЕДИ). Оттаму oбвинија дека во операцијата за враќање на поранешниот премиер Никола Груевски во Северна Македонија вмешани биле група шверцери предводени од претседателот на партијата Али Ахмети, поранешниот вицепремиер Артан Груби и поранешниот министер за надворешни работи Бујар Османи, кој додека бил министер се сретнал со Груевски во Будимпешта.

За утре е предвидено да се одржи првата конститутивна седница на Комисијата за помилување откако таа е веќе комплетирана со нови членови, информираше претседателката Сиљановска-Давкова денеска на брифинг за медиумите.