Министерството за здравство вечерва соопшти дека во домашните здравствени установи низ државата згрижени се над 140 пациенти од трагичната несреќа во Кочани.

Министерството за здравство информира дека од раните утрински часови во Клиничкиот центар функционира кризниот штаб, во тесна координација со Министерството за внатрешни работи и Министерството за надворешни работи.

Над 140 повредени во пожарот во дискотеката во Кочани се згрижени во текот на вчерашниот ден, 90 се наоѓаат во болниците во земјава, а 44 се прифатени во болници во странство.

Денеска се згрижени вкупно 145 настрадани.

Министерството за здравство информира дека во координација со ЈЗУ Психијатриска болница и Клиниката за психијатрија се формираат мобилни тимови составени од психијатри и психолози, кои ќе обезбедуваат психолошка поддршка за семејствата и пациентите.

Министерството за здравство ја отвори телефонската линија за психолошка поддршка на пациентите.

Србија стои на располагање на Македонија со сите свои расположливи капацитети, истакна српската амбасадорка во земјава, Невена Јовановиќ.

Србија стои на располагање на Северна Македонија со сите свои расположливи капацитети, веќе успеавме да згрижиме одреден број повредени во несреќата во Кочани, а еден број од нив и денеска патуваат за Белград, изјави српската амбасадорка во земјава Невена Јовановиќ, по потпишувањето во Книгата на жалост што беше денеска отворена во Министерството за надворешни работи и надворешна трговија.

Претседателката Гордана Сиљановска-Давкова порача дека не треба никогаш повеќе да дозволиме поради манипулација, корупција и занемарување на стандарди да страдаат невини жртви.

Претседателката Гордана Сиљановска Давкова денеска ги посети болниците во Скопје – „Свети Наум Охридски“, „8 Септември“ и Клиничкиот центар, каде што посети дел од повредените во утринскиот страотен пожар во кочанската дискотека „Пулс“, во кој според досегашните информации загинало 51 лице.

Без стандарди и правила не смее да функционира ниту една дејност и ниту одговорен не смее да за трагедијата да ја избегне правдата, порача претседателката Гордана Сиљановска Давкова на прес-конференција.