Палестинското Министерство за образование со седиште во Рамала вчера соопшти дека во Појасот Газа и на Западниот Брег, израелската окупаторска армија убила повеќе од 12.000 палестински ученици и студенти и ранила 19.000 од почетокот на војната за истребување на 7 октомври 2023 година, пренесува . Министерството појасни дека од 7 октомври 2023 година, 11.249 ученици биле убиени, а 17.335 биле ранети во Појасот Газа, додека 80 ученици биле убиени, 479 биле ранети, а 237 од нив биле уапсени на Западниот Брег.

Портпаролот на милитантната група Хезболах, Мохамад Афиф, денеска изјави дека терористичката група не добила официјален предлог за прекин на огнот и дека има доволно оружје и залихи за да води долга војна со Израел.

Израелската војска денеска соопшти дека либанската шиитска милиција Хезболах истрелала околу 165 ракети кон северот на Израел.

Новиот израелски министер за одбрана Израел Кац изјави дека, по израелските воздушни напади врз иранските системи за противвоздушна одбрана, иранските нуклеарни постројки се „поранливи од кога било“.

Лидерите на арапските и муслиманските земји го повикаа Израел од самитот во Ријад целосно да се повлече од арапските територии што ги окупираше за да се постигне „сеопфатен“ мир на Блискиот Исток, пренесуваат агенциите.

САД во Обединетите нации нагласија дека Израел не треба да спроведува „политика на принудно раселување или гладување во Газа“, предупредувајќи дека таквата политика ќе има сериозни последици според американското и меѓународното право.

Германската министерка за надворешни работи Аналена Бербок го повика Израел да ги отвори сите гранични премини во Појасот Газа за да дозволи помошта да дојде во Газа, предупредувајќи дека помошта за крајбрежната палестинска енклава е на рекордно ниско ниво, јави ДПА.