Црвениот крст соопшти дека од донации досега се собрани вкупно 20.932.654,00 денари за поддршка на настраданите во пожарот во Кочани.

Тим од социјални работници – психолози на Црвениот крст на Грција се наоѓа во болниците во Солун и им нуди помош на роднините на повредените кои се хоспитализирани, информираа од грчкиот Црвен крст на социјалните мрежи, јави дописничката на МИА од Атина.

Бугарскиот претседател Румен Радев денеска изрази сочувство до роднините на загинатите во пожарот во Кочани и се потпиша во книгата на жалост во Амбасадата на Република Северна Македонија во Софија.

Трет ден како во Софија се одвиваат крводарителски акции за потребите на повредените од ужасната трагедија којашто се случи во Кочани.

Речиси 100 лица денеска даруваа крв за настраданите во Република Северна Македонија на Воено-медицинската академија (ВМА) во Софија, соопшти медицинската установа.

Четворица повредени во пожарот во ноќниот клуб во Северна Македонија за два дена ќе пристигнат во Хрватска со хеликоптери на хрватската армија, изјави денеска премиерот Андреј Пленковиќ и уште еднаш изрази сочувство до семејствата на загинатите и на преживеаните им посака брзо закрепнување.

Србија стои на располагање на Македонија со сите свои расположливи капацитети, истакна српската амбасадорка во земјава, Невена Јовановиќ.

Србија стои на располагање на Северна Македонија со сите свои расположливи капацитети, веќе успеавме да згрижиме одреден број повредени во несреќата во Кочани, а еден број од нив и денеска патуваат за Белград, изјави српската амбасадорка во земјава Невена Јовановиќ, по потпишувањето во Книгата на жалост што беше денеска отворена во Министерството за надворешни работи и надворешна трговија.